Талғарда УЕФА «A-Elite» курсының төртінші модулі өтіп жатыр
Модульдің негізгі бағыты – футбол академияларының жұмысын ұйымдастыру және дамыту, жас футболшыларды даярлау және элиталық жасөспірімдер футболындағы жүйелі оқу-жаттығу үдерісін қалыптастыру.
Төрт күндік бағдарлама аясында қатысушылар заманауи футбол академиясы жұмысының негізгі бағыттарын меңгереді. Бағдарламаға академия құрылымы мен бөлімдердің өзара іс-қимылы, футболшыларды даярлау философиясы, ойын моделін қалыптастыру, футболшыларды анықтау және іріктеу, оқу-жаттығу үдерісін кезеңдеу, ойыншыларды жеке дамыту және мамандардың пәнаралық өзара іс-қимылы енгізілген.
Матчтар мен оқу-жаттығу үдерісін талдауға, ойын моделінің жүзеге асырылуын бағалауға, сондай-ақ жарыс қызметі мен жаттығу сабақтарының мазмұны арасындағы өзара байланысқа ерекше назар аударылады.
Модульдің практикалық бөлімі әртүрлі жас санатындағы командалардың жаттығуларын бақылауды, кейіннен оларды талдау мен талқылауды қамтиды. Тыңдаушылар сабақтардың құрылымын, футболшылармен жұмысты, жаттығулардың мазмұнын және оқу-жаттығу үдерісінің таңдалған ойын моделіне сәйкестігін бағалайды.
Бағдарламаға халықаралық практикалық тәжірибе де енгізілген. Қатысушылар «Атлетико» академиясының философиясы және жұмыс моделімен, футболшыларды дамудың әртүрлі кезеңдерінде даярлау қағидаттарымен, сондай-ақ оқу-жаттығу үдерісін жоспарлау және ойыншыларды жеке дамыту тәсілдерімен танысады.
Модульдің қорытынды күні өткен материалдар бойынша қорытынды шығарып, рефлексия жүргізуге және қатысушыларды қорытынды бағалауға арналады.
