Астанада Қазақстан әйелдер құрамасына арналған Safeguarding бойынша семинар өтті
Іс-шараның басты спикері ҚФФ Safeguarding бағыты бойынша тәуекел-менеджері Шыңғыс Темірханов болды. Ол өз баяндамасында спортшылардың жеке шекарасын сақтау, олардың негізгі құқықтарын қорғау және команда ішінде барынша қолайлы әрі салауатты атмосфера қалыптастыру мәселелеріне егжей-тегжейлі тоқталды.
Кездесу барысында тәжірибелік мәселелерге ерекше назар аударылды. Футболшы қыздарға қысым көрсету мен кемсітудің кез келген түрінің алдын алу жолдары түсіндірілді. Семинарға қатысушылар жеке шекаралары бұзылған жағдайдағы нақты іс-әрекет алгоритмдерімен танысты, сондай-ақ мұндай оқиғалар туралы қалай және қандай арналар арқылы қауіпсіз әрі құпия түрде хабарлауға болатыны жөнінде толық нұсқаулық алды.
Safeguarding бағытындағы мұндай бейінді кездесулерді өткізу – отандық футболдың барлық деңгейіндегі ойыншылардың психологиялық және физикалық саулығын қорғауға бағытталған Қазақстан футбол федерациясының жүйелі жұмысының маңызды бөлігі.