Бауыржан Тұрысбек: «Матчтың нәтижесі біздің ойынымызға тәуелді»

10 қыркүйек 2018, 00:27

Қазақстан Ұлттық құрамасының шабуылшысы Бауыржан Тұрысбек матч алдындағы баспасөз мәслихатында журналистердің сауалына жауап берді.

- Бауыржан, қарсыластың ойынын зерттеп, әлсіз және мығым тұстарын анықтап үлгерген шығарсыз? Ойынға жоспар қандай болмақ?

- Қарсыластың ойынын қарап, дайындалдық. Бас бапкердің айтқанындай, матчтың нәтижесі біздің ойынымызға тәуелді. Матчта бас бапкердің талабын орындап, жақсы ойын көрсетуге тырысамыз. Ертеңгі ойында жеңіске жету үшін бар күшімізді саламыз.

- Сіздің ұлттық құрамаға салған екі голыңызды көрдік. Ертең қанша гол соғасыз?

- Мен шабуылшымын. Сол себепті әрқашан гол салуды мақсат қоямын. Ертең алаңға шығып жатсам, гол соғу деген нақты мақсат болмайды. Ең басты мақсат - команданың жеңіске жетуі. Мүмкіндік болып жатса, алаңнан голсыз кетпеймін.