Дәурен Тұрсағұлов: «Португалия құрамасында қатты өзгеріс болған жоқ»

24 қыркүйек 2024, 22:31

Футзалдан Қазақстан ұлттық құрамасының шабуылшысы Дәурен Тұрсағұлов Португалиямен өтетін кездесу туралы ойын ортаға салды.

– Әлем чемпионатының плей-офф кезеңіндегі қарсылас анықталғаннан бастап дайындалып жатырмыз. Португалия – жақсы команда. Олардың ойындарын зерттеп, жақсы және әлсіз тұстарын сараладық. Өткен Әлем чемпионатынан бері Португалия құрамасында қатты өзгеріс болған жоқ. Тура сол құрам десе болады, 1-2 ғана ойыншы өзгерген. Ойын жүйесі де сол қалпы. Әлем чемпионатын сыртта қарап отырған өте қиын. Енді алаңда барлық күш-жігерімді көрсетуге тырысамын. Әндіжанда өткен екінші ойында жергілікті халықтың қолдау көрсеткенін көрдім. Өте мейірімді жанкүйерлер екен. Көп жиналды. Мұндайды күтпедім. Көп рақмет айтамын. Келесі ойынға да келіп, қолдау көрсетіңіздер!