ҚФФ Техникалық даму комитетінің кезекті отырысы өтті
Негізгі бөлімде техникалық дамуға қатысты маңызды мәселелер қаралды. Ұлттық құрамалардың дайындығы, алға қойылған мақсаттар мен міндеттер талқыланды. Сондай-ақ дайындықтың нәтижесін арттыру үшін KPI жүйесін енгізу мәселесі көтерілді.
Комитет мүшелері ҚФФ Жарыстар департаментінің 2005 және 2006 жылы туған ойыншыларды Екінші лига командаларының тізіміне қосу туралы ұсынысымен танысты. Бұл бастама жас футболшыларға көбірек ойын тәжірибесін беріп, олардың кәсіби өсуіне жағдай жасауға бағытталған.
Жиында ұлттық құрамалардағы тәлімгерлік жүйе туралы да айтылды. Менторлық тәсіл тәжірибені жүйелі түрде жеткізуге, дайындықта ортақ бағыт ұстануға және жас ерекшеліктері арасындағы байланысты күшейтуге көмектеседі.
Сонымен қатар Павел Черепанов аналитикалық платформаны таныстырды. Презентацияда «Болашақ чемпиондар» жобасы, ҚФФ Академиясының философиясы, Техникалық орталықтың жұмыс жоспары және талантты бапкерлерді қолдау бағдарламасы айтылды. Бұл бастамалардың барлығы мамандар мен ойыншыларды жүйелі түрде дамытуға бағытталған.
ҚФФ Техникалық даму комитетінің мүшесі, ардагер футболшы, бапкер Асқар Қожабергенов отырысты қорытындылады:
- Федерация Техникалық даму комитетін құрғаны өте дұрыс қадам деп ойлаймын. Өйткені бұл комитетте Қазақстан футболына үлкен еңбек сіңірген мамандар бар. Бүгінгі отырыста бірінші және екінші лигадағы лимит мәселесін талқыладық. Жас футболшыларға көбірек мүмкіндік беру жайын қарастырдық. Мұның бәрін ұлттық құрамалардың ойындарымен сәйкестендіру керек. 2006, 2007, 2008 жылғы ойыншылардың тұрақты практика алуы үшін лимитті сақтаудың маңызы зор.
Бұдан бөлек, Қазақстан футбол федерациясының жалпы философиясын талқыладық. Барлық бағыттарды бөліп-бөліп қарап, танысып шықтық. Ұлттық құрамалар департаментінің басшысы Руслан Балтиев барлық құрамалардың бапкерлер штабымен таныстырып, алдағы жоспарлар туралы айтты. Оқу-жаттығу жиындары мен УЕФА турнирлері де сөз болды. Отырысты өте өнімді өтті деп бағалаймын. Келесі кезеңде аналитика мәселесіне де тоқталамыз.
Бұрын ұлттық және жасөспірімдер құрамаларының бапкерлерін тек президент немесе бас хатшы тағайындайтын. Қазір Қазақстандағы тәжірибелі мамандардың пікірін ескеріп, ортақ талқылау арқылы шешім қабылдау – футболымыз үшін пайдалы қадам. Жанкүйерлер де «неге осы бапкер?» деп сұрақ қояды. Ал енді білікті мамандар ашық талқылап, өз ойларын айтып, қолдау көрсетіп отырса, бұл ұлттық құрамаларға да, жалпы қазақ футболына да оң әсерін тигізеді деп сенемін.
