Адиля Вылданова: «Жанкүйерлерге қуаныш сыйлауға тырысамыз»

31 тамыз 2019, 10:02

Қазақстан Ұлттық құрамасының жартылай қорғаушысы Адиля Вылданова Қазақстан футбол федерациясының баспасөз қызметіне берген сұхбатында 2021 жылғы Еуропа Чемпионатының іріктеу кезеңінің мақсаттарымен бөлісті:

- Адиля, ҚР Чемпионатында сұрмергендер көшін бастап келесіз. Маусымның үздік шабуылшысы атану мақсатын алға қойдыңыз ба?

- Мақсат қоймадым. Мен үшін маусым сәтті өтіп жатыр. Жасыл алаңға жиі шығамын және қақпаға соққыны жиі бағыттай бастадым.

- Ел чемпионаты биыл қалай өтіп жатыр?

- Соңғы жылдары ел чемпионатының деңгейі төмен. Турнир кестесінде бәсеке болғанын қалаймын. Ол үшін командалардың санын көбейту керек.

- «БИІК-Қазығұрт» командасы Чемпиондар Лигасын жақсы бастады. Команданың алдына қандай мақсат қойылған?

- Басты мақсат – әрі қарай жарысты жалғастыру. Ең жақсы нәтижеге қол жеткізу, қазақстандықтарды қуанту.

- Чемпиондар Лигасының іріктеу кезеңінің ойындарында есте қалған сәттерді айтып өтсеңіз...

- Жеңіспен аяқталған ойындардан кейін жақсы көңіл-күй болды. Нәтиже көңілге қонымды. Бұл естеліктер мәңгі сақталады.

- Қазақстан – Сербия матчынан не күтесіз?

- 2021 жылғы Еуропа Чемпионатының іріктеу кезеңіндегі алғашқы ойын. Жақсы футбол көрсетуге тырысамыз. Ойынның соңына дейін күресеміз. Ең басты – оң нәтиже.

- Алғашқы қарсылас туралы не айтасыз?

- Сербия құрамасы – жақсы қарсылас. Олардың техникалық шеберлігі жоғары болуы мүмкін. Алайда, кез келген командаға лайықты қарсылық көрсетуге болады. Ойынға толық дайынбыз.

- Осы ойында оң нәтижеге қалай қол жеткізуге болады?

- Командалық ойын арқылы оң нәтиже көрсетуге болады. Сонымен қатар, жеңіске жету үміті де әсер етеді.

- 2021 жылғы Еуропа Чемпионатының іріктеу кезеңінен не күтесіз?

- Турнир кестесінің жоғары орындарына ұмтылу қажет. Ұлттық құраманың жанкүйерлеріне қуаныш сыйлауға тырысамыз