Петропавлда UEFA бұқаралық футбол апталығы өтті

24 қыркүйек 2025, 16:40

Петропавл қаласында жыл сайын еуропалық спорт апталығы аясында ұйымдастырылатын UEFA Grassroots Week әуесқой футбол апталығы өтті. Бұл бұқаралық футболды дамыту және танымал ету мақсатында қолға алынған жоба.

Петропавлдан бөлек, UEFA бұқаралық футбол апталығына арналған іс-шаралар Астана, Көкшетау және Қостанай қалаларында да жалғасын табады.

Әмина Аманжол, жас футболшы :
— Мен футболға алты жасымда келдім. Қазір «Қызылжар» жастар командасында ойнаймын. Өзімнің бапкерім Ирина Серіковнаға үлкен алғыс білдіремін. Болашақта кәсіби деңгейде ойнағым келеді. Солтүстік Қазақстан облысында футбол өте жақсы дамып келеді, көптеген ойындар мен түрлі іс-шаралар өткізіледі.

Жобаға Петропавлдан 100-ге жуық бала қатысты. Жас қатысушылар футболдың негізгі қыр-сырын меңгеріп, нағыз кәсіби футболшылар сияқты түрлі жаттығулар жасады. Бұл балаларға өз талантын көрсетіп, спортқа деген қызығушылығын арттыруға тамаша мүмкіндік болды.