Астанада Hawk-Eye жүйесінің таныстырылымы өтті
Іс-шарада ҚФФ Бас хатшысының міндетін атқарушы Александр Кеплин, төрешілік және қадағалау департаментінің директоры Нуну Алешандре Паррейра де Каштру, VAR координаторы әрі нұсқаушысы Леонид Калошин және VAR жобасының жетекшісі Никита Утробин қатысты.
Бағдарлама Нуну Каштрудың таныстырылымымен басталды. Төрешілердің Ойын ережелеріне сәйкес қалай жұмыс істейтінін, негізгі қағидалар мен критерийлерді түсіндірді. Одан кейін Леонид Калошин VAR төрешілер тобының өзара жұмыс істеу тәртібін көрсетті.
«Қазақстан футбол федерациясы мен VAR технологиясының провайдері Hawk-Eye арасындағы келісімшарт 2029 жылғы футбол маусымы аяқталғанға дейін жасалған. Hawk-Eye жүйесі әлемдегі ең ірі турнирлерде, соның ішінде әлем және Еуропа чемпионаттарында, УЕФА Чемпиондар лигасында қолданылады. Енді Қазақстанда да үздік лигалармен қатар төрешілік шешімдердің дәлдігі мен ашықтығын арттыру үшін заманауи технологиялар енгізіліп жатыр», – деді Нуну Каштру.
Таныстырылымның бір бөлігі техникалық жағына арналды. Никита Утробин Hawk-Eye жүйесінің ерекшеліктерін, бұрын Премьер-лигада қолданылған жүйеден айырмашылығын және VAR жұмысына әсер ететін факторларды түсіндірді.
Ресми бөлімнен кейін қатысушылар жүйені іс жүзінде танысып көруге мүмкіндік алды. Қонақтар VAR-симуляторды сынап көріп, жаңа жабдықтың жұмыс істеу ерекшеліктерін зерттеді.
