Самат Смақов: «Бапкер тек алаңда ғана емес, тұлға ретінде де дамуы керек»
– Бағдарламадан қандай әсер алдыңыз?
– Ең алдымен, бұл халықаралық ортада жұмыс істеудің және жоғары деңгейдегі әдіскерлер мен жаттықтырушылармен пікір алмасудың құнды тәжірибесі болды. Мұндай бағдарламалар кәсіби ой-өрісімізді кеңейтіп, жаттығу үдерісіне түрлі тәсілдерді көруге және өз деңгейімізді әділ бағалауға мүмкіндік береді.
Егер салыстыратын болсақ, Қазақстанда біз көбіне практикалық жаттығуларға басымдық береміз. Ал бұл бағдарламада бапкердің тұлғалық дамуына, менталдық қасиеттерге, коучинг дағдыларына және команданы басқару қабілетіне ерекше көңіл бөлінді.
– Осы іс-шара барысында қандай қорытынды жасадыңыз?
– Ең басты қорытынды – футбол тек жаттығулар жиынтығы емес, ең алдымен адамдарды басқару. Ойыншылармен дұрыс қарым-қатынас орнату, жауапкершілікті бөлісе білу және бапкердің тұрақты өзін-өзі дамытуы аса маңызды.
– Сіздің ойыңызша, еуропалық футболдағы қандай заманауи үрдістерді Қазақстанда енгізу маңызды?
– Әрине, еуропалық тәсілдерді сол күйінде көшіру дұрыс емес. Дегенмен негізгі тенденцияларды бейімдеу қажет. Бұл – бапкер мен команданың икемділігі, жаттықтырушылық құзыреттерді дамыту, нақты ойын қағидаларын қалыптастыру және өтпелі кезеңдерге ерекше назар аудару.
– Шон Дайч пен Анже Постекоглу сияқты мамандардың қандай ойлары сізге ерекше әсер етті?
– Шон Дайчтың қарапайымдылыққа негізделген тәсілі, тәртіпке баса мән беруі және мықты менталитет қалыптастыруы ерекше әсер қалдырды. Ал Анже Постекоглу ойынның өзіндік стилін қалыптастыруға, команда ішіндегі коммуникацияға, жаттықтырушылар штабы мен ойыншылар арасындағы сенімге және дұрыс орта құруға ерекше көңіл бөледі.
– Осы бағдарламадан кейін жұмысыңызда қандай идеялар мен құралдарды қолдануды жоспарлап отырсыз?
– Мұндай бағдарламалардың басты нәтижесі – нақты жаттығулар емес, бапкердің күнделікті жұмысындағы өзгерістер. Ең алдымен, деректерді жүйелі талдау, ойын қағидаларымен жұмыс істеу, команда ішіндегі коммуникацияны дамыту және әр ойыншыға жеке көзқарас қалыптастыруға назар аударамын. Сонымен қатар, өз кәсіби дамуыммен тұрақты түрде айналысуды жалғастырамын.
