«Восток» стадионы Қазақстан Премьер-лигасының матчтарын қабылдауға рұқсат алды

06 мамыр 2026, 16:10

Фото: ФК «Алтай»

Өскемен қаласындағы «Восток» стадионы қайта жөндеуден кейін Қазақстан Премьер-лигасының матчтарын өткізуге рұқсат алды. Арена жарыс регламентінің минималды талаптарына толық сәйкес келеді.

Көпжылдық үзілістен кейін Қазақстан футболының жоғарғы дивизионындағы матчтар Өскеменге қайта оралды.

Реконструкция барысында стадион инфрақұрылымының негізгі аймақтары жаңартылды. Аренада командалар мен төрешілерге арналған заманауи киім ауыстыру бөлмелері, ойыншылар мен көрермендерге арналған медициналық бөлме, жабдықталған баспасөз мәслихаты залы, сондай-ақ VAR бейнекөмек жүйесіне арналған арнайы бөлме пайда болды.

Ойын алаңы толығымен жаңартылды: стадион ФИФА сертификатына ие соңғы үлгідегі жасанды төсенішпен жабдықталды. Сондай-ақ аренада заманауи LED-жарнамалық борттар орнатылды.

Жөндеу жұмыстарының қорытынды кезеңі аясында «Восток» стадионында заманауи жарықтандыру жүйесі орнатылады.

Айта кетейік, «Восток» – УЕФА-ға мүше барлық елдердің ішіндегі ең шығыста орналасқан стадион.

Қазақстан Премьер-лигасының биылғы маусымындағы «Восток» стадионында өтетін алғашқы матч 10 мамырға жоспарланған. Өз алаңындағы ойында «Алтай» командасы шымкенттік «Ордабасыны» қабылдайды.