Ойын ережелеріне сәйкес Премьер-лиганың 14-турындағы жекелеген ойын сәттеріне түсіндірмелер

Ұлытау – Жетісу

19-минут – Қожайындар айып алаңында қонақтар командасының шабуылшысы допты қатты және жақын қашықтықтан қақпаға бағыттап тепкенде, ол қорғаушы №30-дың қолына тиеді. Қорғаушының қолы денесіне жақын, табиғи жағдайда орналасқан болатын.

Төрешінің ойынды жалғастыру туралы шешімі дұрыс, себебі қорғаушы тарапынан ойын ережесін бұзу болмады.

VAR жүйесінің араласпауы – дұрыс шешім.

Тобыл – Жеңіс

71-минут – Қонақтар командасының айып алаңында қорғаушы №63 шабуылшы №14-ті екі қолымен ұстап тұрады. Осы сәтте шабуылшы №10 допты айып алаңына асырғанда, доп қорғаушы №63-тің ашық тұрған қолына/шынтағына тиеді, ал ол сол сәтте қарсыласын ұстап тұрғандықтан, дене көлемін ұлғайтып тұрған.

Төреші бұл сәтті көре алмады, себебі оның көру бұрышы шабуылшы тарапынан жабылды.

VAR жүйесінің ойын ережесін бұзу (қолмен ойнау) үшін араласуы және бейнеқайталауды (OFR) ұсынуы – дұрыс шешім.

Төрешінің соңғы шешімі – пенальти белгілеу – дұрыс.

Қайсар – Елімай

76-минут – Қақпа сызығына өте жақын жерде, доп ойын алаңынан шыққалы жатқанда, қожайындар командасының ойыншысы №29 қарсыласын арт жағынан, допқа ойнау мүмкіндігі болмаған күйде, қолымен басынан соғады. Бұл соққы едәуір күшпен жасалған. Футбол ережелеріне сәйкес: «…, егер ойыншы допқа таласпай, қарсыласын әдейі қолымен немесе қолдың бөлігімен басынан немесе бетінен ұрса, бұл – агрессиялық әрекет (violent conduct) болып саналады, егер соққының күші елеусіз болмаған жағдайда».

Төреші бұл оқиғаны мүлде байқамай, ойынды жалғастыра береді – бұл қате шешім.

VAR жүйесінің араласуы және бейнеқайталауды ұсынуы – дұрыс шешім.

Төрешінің соңғы шешімі – №29 ойыншыны агрессиялық әрекеті үшін тікелей қызыл карточкамен ойыннан шығару – дұрыс.

90+3-минут – Қонақтар айып алаңында қожайындар командасының шабуылшысы №19 мен қорғаушы №3 допқа таласып жатыр. Қақпаға қарай қозғалған кезде шабуылшы арт жағынан сол аяғымен қорғаушының оң аяғына соғып, оны теңгерімінен айырып, әділетсіз түрде басымдыққа ие болады. Осыдан кейін қорғаушы шабуылшының сол қолын екі қолымен ұстап, шабуылшыны құлатады.

Төреші алғашқы ереже бұзушылықты байқамай, кейін қорғаушының әрекеті үшін пенальти белгілеп, оған сары карточка көрсетеді.

VAR жүйесінің шабуыл алдындағы фол (APP) үшін араласуы және бейнеқайталауды ұсынуы – дұрыс шешім.

Төрешінің соңғы шешімі – шабуылшының ереже бұзғанын анықтап, қорғаушы пайдасына айып добын белгілеу және сары карточканы алып тастау – дұрыс.

Ордабасы – Қайрат

57-минут – Қожайындар командасының ойыншысы №98 жылдам шабуыл жасап, қарсыластарынан өтіп бара жатқанда, қонақтар командасының ойыншысы №15 арт жағынан оны шалып, екі қолымен ұстап тоқтатады. Бұл әрекеттің жалғыз мақсаты – үміт күттіретін шабуылды тоқтату болды.

Төреші жақын жерде тұрып, ереже бұзушылықты белгілейді, бірақ №15 ойыншыға екінші сары карточка көрсетіп, ойыннан шығару керек екенін ескермей қояды.

VAR жүйесінің араласпауы – дұрыс, себебі мұндай жағдайлар VAR хаттамасына сәйкес қарастырылмайды.