Олжас Абраев Чемпиондар лигасының «Айнтрахт» – «Тоттенхэм» матчына делегат болып тағайындалды

26 қаңтар 2026, 17:06

Қазақстандық маман Олжас Абраев УЕФА Чемпиондар лигасы негізгі кезеңінде Германияның «Айнтрахт» және Англияның «Тоттенхэм» клубтары арасындағы ойынның делегаты болды.

Кездесу қаңтардың 28-нен 29-на қараған түні сағат 01:00-де (Қазақстан уақытымен) Германияның Майндағы Франкфурт қаласындағы «Айнтрахт» стадионында өтеді.

Олжас Абраев – 2013 жылдан бері УЕФА матчтарының делегаты, ал 2016 жылдан бастап ФИФА-ның матч комиссары.

Айта кету керек, УЕФА матчтарына тағайындалған делегат ұйымның ресми өкілі ретінде ойындарда бақылаушы қызметін атқарады. Ол матч алдындағы ұйымдастыру жиынына төрағалық етіп, ойынның тәртіпті әрі қауіпсіз өтуін, регламент талаптарының сақталуын қамтамасыз етуге жауапты.

Сондай-ақ, стадион мен оның аумағындағы тәртіп пен қауіпсіздік ережелерінің орындалуын бақылайды. Қажет болған жағдайда делегат УЕФА әкімшілігінің өтініші бойынша дайындық барысы жөнінде есеп береді және турнир өтетін нысанның дайындығын алдын ала бағалайды.